Información xeral

 

Para calquera das modalidades, velaquí toda a información que debes coñecer para realizar a túa estadía na Universidade de Vigo. 

Portal do alumnado

 Accede ao portal para facer o teu rexistro como estudante entrante da UVigo!

Portal do alumnado entrante

Calendario académico

Aquí poderás consultar os calendarios académicos dos distintos cursos:

Acceso aos campus

 A Universidade de Vigo é unha universidade pública nova situada nas dúas provincias do sur de Galicia (Pontevedra e Ourense) coas súas facultades divididas en tres campus universitarios.

 

Tarxeta universitaria intelixente (TUI)

O carné universitario é o documento que identifica a todos os membros da comunidade universitaria. Permite o acceso a diversos servizos como o préstamo de libros en bibliotecas ou o acceso a instalacións de uso restrinxido.

Tarxeta Universitaria Intelixente

 

Biblioteca

A Biblioteca Universitaria ofrece unha ampla gama de recursos de información, espazos e servizos para apoiar as actividades de aprendizaxe, docencia e investigación.

Está presente nos tres campus a través dunha rede formada por once bibliotecas coordinadas pola biblioteca central do campus de Vigo.

Poderás tomar en préstamo libros e documentos, solicitar salas de traballo en grupo ou acceder a ordenadores grazas á túa tarxeta universitaria intelixente (TUI).

A biblioteca

 

Requisitos lingüísticos

As clases impártense maioritariamente en castelán ou en galego, á elección do profesorado responsable da materia. Tamén contamos cunha oferta de materias en inglés e outras chamadas "English Friendly" ofertadas en castelán ou en galego, pero nas que o profesorado facilita contidos en inglés.

O alumnado que queira estudar na UVigo deberá ter un bo nivel de español ou inglés. En xeral, é moi recomendable ter un nivel mínimo equivalente a un B1 en castelán/galego para acadar un bo rendemento académico e un B2 en inglés para as materias impartidas nese idioma. Os nosos programas de bacharelato e máster impártense principalmente en castelán ou galego.

Cursos de español

Ao comezo de cada cuadrimestre o Centro de Linguas (CDL) organiza cursos de español como lingua estranxeira para o estudantado de intercambio. Estes cursos están orientados a proporcionar os coñecementos básicos da lingua española para facilitar a integración académica e social do estudantado internacional de fala non española. Impártense todos os niveis.

Nota: Ao comezo de cada cuadrimestre teñen lugar as probas de nivel.

Duración

O curso ten unha duración de 60 horas e comeza en setembro/outubro (para estudantes de curso completo e do 1.º cuadrimestre) e en xaneiro/febreiro (para estudantes do 2.º cuadrimestre).

​Créditos

O curso dará dereito á obtención de 4 créditos ECTS. Para obter o certificado cómpre asistir, como mínimo, ao 85% das clases e superar un exame final.

É importante subliñar que esta cualificación non figurará no certificado oficial de notas porque non forman parte dos estudios incluidos no programa de grao, mestrado ou doutoramento

O diploma acreditativo deberá recollerse no Centro de Linguas antes de abandonar a UVigo.

Curso de lingua e cultura galegas

As linguas oficiais en Galicia, na universidade e na administración, son o galego e o castelán.

Dende a Área de Normalización Lingüística ofrécese o curso de Iniciación á lingua galega para estudantes de programas de intercambio. Trátase dun curso gratuíto de lingua e cultura galega, con clases virtuais sincrónicas, de 40 horas de duración, validado con 1,3 ECTS e recoñecido cun diploma expedido pola Universidade de Vigo.

Esta cualificación non aparecerá no seu expediente oficial porque estes estudos non están incluídos en programas de grao, mestrado ou doutoramento.

 

 

Erasmus Student Network (ESN)

 Erasmus Student Network (ESN) é unha das maiores asociacións de estudantes interdisciplinares de Europa. ESN Vigo fundouse o 5 de novembro de 2009 e, desde entón, o seu número de socios e socias non deixou de crecer para que calquera estudante internacional e de intercambio se sinta como na casa. Se acabas de chegar, necesitas apoio para a túa estadía ou queres coñecer xente nova, podes contactar co servizo Erasmus Student Network Buddy Program.

 

Aloxamento

A continuación presentámosche as diversas opcións de aloxamento para que poidas realizar os teus estudos na Uvigo

Opcións de aloxamento

Ademais, a asociación ESN Vigo ofrece axuda á hora de buscar aloxamento. Contacta con eles: info@esnvigo.org

 

Transporte en Galicia

 En canto ao transporte fóra dos núcleos urbanos, hai conexións de autobús ou tren coas cidades máis próximas.
Se o desexa, pode solicitar a Tarxeta de Mobilidade de Galicia (TMG) que permite obter descontos de prezos en calquera servizo de transporte público de toda Galicia e subvencionar a súa repetición.

Tamén podes consultar a información das liñas de autobús e de tren.
 

Cobertura sanitaria e seguro médico

É imprescindible que o estudantado estranxeiro posúa un seguro médico con validez en España.

O estudantado da Unión Europea pode utilizar a súa tarxeta sanitaria europea. O estudantado extracomunitario mundo debe contratar un seguro con validez en España.

Recomendámoslle a todo o estudantado que contrate un seguro médico internacional con calquera compañía de seguros, que inclúa a cobertura de accidentes, o traslado sanitario internacional, a asistencia en viaxes, a repatriación en caso de accidente ou enfermidade grave, defunción etc.

A UVigo negociou coa compañía de seguros ONCAMPUS unha cobertura moi ampla para estudantes internacionais cunha única cota por período e que resulta bastante asequible. Se che interesa, podes contratalo directamente coa compañía a través do seu sitio web (lembra seleccionar a UVigo entre as opcións dispoñibles): Oncampus-estudia.

Unha vez en España, o estudantado procedente da Unión Europea deberá acudir a un centro de saúde da Seguridade Social (ver enderezos) coa súa tarxeta sanitaria europea, onde lles asignarán un médico xeral.

O estudantado extracomunitario deberá informarse no seu país de orixe dos hospitais e dos centros de saúde cos que a súa compañía aseguradora ten acordos en España. Xeralmente, neste último caso, o/a estudante asume os gastos sanitarios e posteriormente solicítalle o reembolso destes á súa compañía de seguros.

O sistema sanitario público español non cobre os gastos médicos dos cidadáns de países de fóra da Unión Europea. No caso de que se dirixan ao sistema médico público, deberían ter que pagar a atención e o prezo será maior que o dun centro médico privado, porque o sistema público está saturado.

 

Deportes

En cada un dos nosos campus atoparás espazos deportivos para realizar a túa actividade física favorita: fitness, natación, tenis, baloncesto, xadrez, tenis de mesa... Ademais, a universidade colabora cunha ampla oferta de centros deportivos.

Podes utilizar as instalacións deportivas nas mesmas condicións que a comunidade universitaria.

Máis información

 

Comedores

Nos tres campus temos cafeterías e restaurantes nos que podes facer un descanso ou comer a prezos accesibles.

Máis información

 

Visados e outros trámites

O estudantado dos países membro da UE e de Islandia, Liechtenstein, Noruega e Suíza non precisan visado de entrada para estudar na UVigo, pero deben obter o Certificado de Rexistro de Cidadán da Unión

No caso do estudantado doutros países, pero procedentes de universidades de países membros da UE e de Islandia, Liechtenstein, Noruega e Suíza, deberán solicitar a Autorización de Estancia para Estudos de Mobilidade dentro da Unión Europea.

O estudantado non comunitario:

•  Que curse un cuadrimestre (1º ou 2º) deben solicitar un visado de estudante nos consulados españois do seu país de orixe.
•  Que veñan facer un curso anual deben solicitar o visado de estudante (nos consulados de España no seu país de orixe) e a Tarxeta de Identidade de Estranxeiro (TIE). Lembra ampliar ou prorrogar o teu visado de estudiante se o precisas

Cómpre realizar as xestións de solicitude de visado con tempo para evitar posibles retrasos. 

 

Conta bancaria

Se necesitas abrir unha conta bancaria, podes acudir a calquera oficina e presentar a carta de invitación e o pasaporte.

No campus da UVigo podes atopar as oficinas de Abanca e do Banco Santander.

Se queres facilidade á hora de crear e xestionar a túa nova conta bancaria, tamén podes usar a Revolut. Non ten requisitos de apertura, ofrece unha tarxeta coa que podes retirar ata 200 euros mensuais en metálico en calquera caixeiro automático do mundo sen ter que pagar comisións e tamén podes pagar as túas compras noutras moedas co tipo de cambio interbancario.

​​​

Descarga a guía