Unhas xornadas achéganse ao papel das mulleres en diferentes momentos históricos

A Facultade de Historia do campus de Ourense organizou este xoves a xornada Mulleres no tempo. A cita contou con tres conferencias: unha sobre dereito, muller, moral e criminalidade na Idade Moderna (a cargo de José Luis de las Heras, da Universidad de Salamanca); outra sobre muller e traballo na Galicia do primeiro terzo do século XX (con Luisa María Muñoz, da Universidade de Santiago de Compostela) e unha última sobre a historia da muller galega en Santiago de Cuba (1902-1942), ofrecida por Mónica García, da Universidad de Oriente (Cuba).

Julio Prada, decano da Facultade de Historia, destacou na presentación das xornadas que o seu o obxectivo foi que o alumnado “visibilízase a existencia de temáticas transversais ás diferentes áreas” e abordar “unha especie de viaxe do tempo” que lles permitise reflexionar sobre diversos aspectos da historia das mulleres, destacando así “o carácter diacrónico dunha liña de investigación que é susceptible das máis diversas aproximacións”. O responsable académico insistiu na necesidade de ter cada vez máis presente nas diferentes investigacións a presenza feminina na historia e tamén reflexionar sobre unha "vella polémica que ten as súas implicacións metodolóxicas na historia" que é “a de responder á pregunta de se a inclusión das mulleres nas investigacións sobre o pasado debe servir simplemente para ampliar a historia ou para reinterpretala desde unha óptica de xénero”. O centro ten previsto celebrar unha segunda sesión destas xornadas o 31 de outubro, xa do vindeiro curso académico.